Bruno Fernandes Manchester Yunayted yig‘inini ijobiy baholadi

Manchester Yunayted futbol klubi yarim himoyachisi Bruno Fernandes jamoaning mavsumoldi yig‘inidagi natijalari haqida o‘z fikrini bildirdi. Bu haqida Euro-football.ru xabar berdi.

Yakshanba kuni “qizil iblislar” “Everton” jamoasiga qarshi o‘rtoqlik uchrashuvida 2:2 hisobida durang o‘ynadi va shu natija bilan yozgi Premyer-liga seriyasida g‘oliblikni qo‘lga kiritdi. Mazkur turnirda, shuningdek, “Vest Xem” va “Bornmut” klublari ham ishtirok etdi.

Musobaqa AQSHda tashkil etildi. Bruno Fernandesning so‘zlariga ko‘ra, ushbu yig‘in futbolchilar o‘rtasidagi o‘zaro aloqani mustahkamlash, yangi o‘yinchilarni jamoaga moslashtirish va o‘yin uslubiga ko‘nikish uchun muhim bosqich bo‘ldi.

Jamoa sardori bu jarayon jamoaning kelgusi mavsumdagi o‘yinlariga ijobiy ta’sir ko‘rsatishiga ishonch bildirgan. O‘tgan Angliya chempionati mavsumida Manchester Yunayted 15-o‘rinda yakunlagan va xalqaro musobaqalarda ishtirok etish huquqini qo‘lga kirita olmagan.

Klub rahbariyati va jamoa yangi mavsumda yaxshi natijalarga erishish uchun harakat qilmoqda.