Gazizov legionerlar cheklovi kuchayishiga qarshi chiqdi
Kelgusi mavsumdan Rossiya Premer-ligasida legionerlar soniga qo‘yiladigan cheklovlar kuchaytirilishi kutilmoqda. Bu haqida Euro-football.ru xabar berdi.
Bu borada Maxachkala shahrining “Dinamo” klubi bosh direktori Shamil Gazizov o‘z fikrini bildirdi. Unga ko‘ra, hozirgi vaqtda Rossiyada xorijlik futbolchilarga nisbatan cheklovlarni kuchaytirish uchun hali erta.
Gazizovning aytishicha, mamlakat futboli xalqaro musobaqalarda ishtirok etmayotgan bir paytda bu kabi choralarni joriy etish maqsadga muvofiq emas. U, agar Rossiya klublari Yevropa maydonlarida o‘z o‘yinini namoyish eta boshlasa, shundagina legionerlar cheklovini kuchaytirish to‘g‘ri bo‘lishini ta’kidladi.
Gazizov, shuningdek, so‘nggi yillarda Premer-ligada biror klubning to‘liq ustunligi kuzatilmayotganini legionerlar cheklovining nisbatan yumshoq bo‘lishi bilan izohladi. Hozirda Rossiya Premer-ligasi klublariga bir mavsumda eng ko‘pi bilan 13 nafar legionerni ro‘yxatdan o‘tkazishga ruxsat berilgan.
Ularning 8 nafari bir vaqtda maydonda harakat qilishi mumkin. Ma’lum qilinishicha, yaqin kunlarda ushbu “13+8” tizimi o‘rniga “10+5” tizimi joriy qilinishi mumkin.
Bu esa legioner futbolchilar soni yanada kamayishini anglatadi. Mutaxassislar bu o‘zgarishlar Rossiya futbolining rivojiga qanday ta’sir ko‘rsatishini muhokama qilmoqda.
