"Manchester Siti" markaziy himoyachisi Vitor Reis "Jirona" klubiga ijaraga berilishi kutilmoqda. Bu haqida Euro-football.ru xabar berdi.
Klublar 19 yoshli futbolchini vaqtincha boshqa jamoaga o‘tkazish borasida kelishuvga erishdi. Bu haqda taniqli jurnalist Fabrizio Romano xabar berdi.
Yaqin kunlarda braziliyalik futbolchi Ispaniyaga yo‘l oladi va u yerda tibbiy ko‘rikdan o‘tadi. Tibbiy ko‘rik natijasidan so‘ng ijara kelishuvi rasman tasdiqlanadi.
Eslatib o‘tamiz, "Manchester Siti" Vitor Reisni joriy yil yanvar oyida Braziliyaning "Palmeyras" klubidan 37 million yevro evaziga sotib olgan edi. Yosh futbolchi bilan tuzilgan shartnoma 2029 yilgacha mo‘ljallangan.
Vitor Reis "Manchester Siti" tarkibida hozirgacha to‘rtta o‘yinda maydonga tushdi. Biroq, u hali natijali harakatlar bilan ajralib chiqqani yo‘q.
Shu tariqa, yosh futbolchi o‘zining tajribasini oshirish va doimiy o‘yin amaliyotiga ega bo‘lish maqsadida "Jirona" safida mavsumni davom ettirishi mumkin.
