“Match TV” telekanalining sharhlovchisi Kirill Krestinin RPLning uchinchi turi doirasidagi “Zenit” va Moskvaning CSKA jamoalari o‘rtasidagi uchrashuvdan tayyorlangan reportajda yo‘l qo‘ygan xatosi uchun CSKA muxlislaridan uzr so‘radi. Bu haqida Euro-football.ru xabar berdi.
U uchrashuv davomida “Zenit” bosh murabbiyi Sergey Semakning murabbiylar shtabini “bizning murabbiylar shtabimiz” deb ataganini tan oldi. Krestinin bu holatni o‘zining Sankt-Peterburg shahridan ekanligi bilan izohladi va bu xatti-harakatini efirda yo‘l qo‘yib bo‘lmaydigan xato deb e’tirof etdi.
U CSKA jamoasi muxlislaridan kechirim so‘rab, kelgusida bunday holat takrorlanmasligini ta’kidladi. Krestinin o‘z ishini xolis va professional tarzda olib borishini, “Zenit” jamoasi gol urgan yoki gol o‘tkazib yuborgan vaziyatlarda ham hissiyotlarga berilmaganini aytdi.
U unga bildirilgan tanqidlarga javoban o‘zini adolatli va betaraf deb hisoblashini ma’lum qildi. Shu bilan birga, Krestinin o‘zini tahlilchi sifatida ko‘rmasligini, shu sabab “Zenit” jamoasini tanqid qilishdan tiyilganini bildirdi.
Ma’lumot uchun, ushbu uchrashuv 1:1 hisobida durang bilan yakunlandi.
