Karreras Realda Xabi Alonso bilan ishlashdan mamnun

Madridning “Real” futbol klubi himoyachisi Alvaro Karreras jamoaning bosh murabbiyi Xabi Alonso bilan ishlash haqida o‘z fikrlari bilan o‘rtoqlashdi. Bu haqida Euro-football.ru xabar berdi.

Chap qanot himoyachisi joriy yilning o‘tgan oyida “Real” safiga qo‘shildi. Klub 22 yoshli futbolchini Portugaliyaning “Benfika” jamoasidan sotib oldi va bu transfer uchun 50 million yevro to‘lagan.

Alvaro Karreras Xabi Alonsoning talablarini juda aniq va tushunarli deb hisoblashini ta’kidladi. Uning so‘zlariga ko‘ra, bosh murabbiy jamoaga yuqori sur’atda va faol o‘yin ko‘rsatishni talab qiladi.

Yangi futbolchi Xabi Alonsoning ish uslubidan mamnunligini bildirib, aynan shunday yondashuv unga manzur ekanini ma’lum qildi. Ma’lumotlarga ko‘ra, Xabi Alonso iyun oyining boshida “Real” bosh murabbiyi lavozimini egalladi.

U bu lavozimda ilgari ishlagan Karlo Anchelottini almashtirdi. “Real” jamoasi yangi mavsumni 19 avgust kuni boshlaydi.

Ular La Liga doirasidagi ilk uchrashuvda “Osasuna” klubiga qarshi maydonga chiqadi. Uchrashuv Madriddagi “Santyago Bernabeu” stadionida bo‘lib o‘tadi.