Mashhur futbol agenti Aleksey Safonov poytaxtning “Spartak” jamoasi bosh murabbiyi Dejan Stankovichning lavozimidan bo‘shatilishi ehtimoli haqida o‘z fikrini bildirdi. Bu haqida Euro-football.ru xabar berdi.
Agentning ta’kidlashicha, jamoaning natijalari ko‘p jihatdan futbolchilarning kayfiyatiga bog‘liq bo‘ladi. Agar futbolchilar murabbiydan qasddan voz kechmasalar va Stankovich ularga o‘zini tiklashda yordam bera olsa, vaziyat barqarorlashishi mumkin.
Safonovning so‘zlariga ko‘ra, “Spartak” o‘z oldidagi muammolarni yengib o‘ta oladi va kuchli uchlik uchun kurashishni davom ettiradi. U, shuningdek, muxlislar jamoadan yuz o‘girmasligiga ishonch bildirdi va har bir navbatdagi uchrashuvda o‘z ustunliklarini isbotlash zarurligini ta’kidladi.
Ma’lumot uchun, uch turdan so‘ng “Spartak” Rossiya chempionatida to‘rt ochko bilan 11-o‘rinda bormoqda. Navbatdagi turda “qizil-oq”lar “Lokomotiv” jamoasiga qarshi maydonga tushadi.
