Bavariya va Nyukasl Nikolas Jekson transferiga qiziqmoqda
"Bavariya" futbol klubi yozgi transfer bozorida hali o‘z faoliyatini yakunlamagan. Bu haqida Euro-football.ru xabar berdi.
Ma’lum bo‘lishicha, Germaniyaning mashhur klubi "Chelsi" hujumchisi Nikolas Jekson haqida ma’lumot to‘plagan. Klub vakillari futbolchining hozirgi holati, transfer narxi va sog‘lig‘i haqida batafsil ma’lumot olgan.
Shuningdek, taniqli jurnalist Florian Plettenbergning xabar berishicha, Nikolas Jeksonni boshqa klublar ham diqqat bilan kuzatmoqda. Jumladan, Angliyaning "Nyukasl" jamoasi 24 yoshli hujumchini o‘z safiga qo‘shib olishga jiddiy qiziqish bildirgan.
"Nyukasl" avvalroq Benyamin Sheshko uchun kurashda mag‘lub bo‘lgan va Aleksandr Isakni ham yo‘qotish xavfi bor. Joriy yozda Nikolas Jeksonning transfer qiymati taxminan 65 million yevroga baholanmoqda.
U "Chelsi" safida jami 81 ta o‘yinda maydonga tushib, 30 ta gol urgan va 12 marta jamoadoshlariga golli uzatma bergan. Shu sababli, futbolchiga bo‘lgan qiziqish ortib bormoqda va uning kelajagi borasida turli taxminlar mavjud.
Hozircha "Bavariya" va "Nyukasl" klublari futbolchi uchun asosiy da’vogarlar sifatida ko‘rilmoqda.
