Parij Sen-Jermen futbol klubi darvozaboni Janluiji Donnarumma joriy transfer oynasida jamoasini o‘zgartirishi mumkin. Bu haqida Euro-football.ru xabar berdi.
Italiyalik posbonning klub bilan amaldagi shartnomasi kelasi yilda yakuniga yetadi. Hozirga qadar tomonlar yangi shartnoma borasida kelishuvga erisha olishmadi.
Shu sababli, Parij klubi Donnarummaga o‘rinbosar topishga kirishdi. Ma’lumotlarga ko‘ra, Luis Enrike boshchiligidagi jamoaga tez orada Lill klubi darvozaboni Luka Shevalye qo‘shilishi kutilmoqda va u asosiy darvozabon bo‘lishi rejalashtirilgan.
Shu bilan birga, jurnalist Ekrem Konur xabariga ko‘ra, Donnarumma o‘z faoliyatini qayerda davom ettirish haqida qaror qabul qilgan. Manbalarga ko‘ra, 26 yoshli darvozabon Angliya Premer-ligasida o‘zini sinab ko‘rmoqchi.
Uning xizmatlariga eng asosiy da’vogar sifatida Manchester Yunayted klubi ko‘rilmoqda. Donnarumma uchun yangi chempionatda o‘ynash imkoniyati ochilishi mumkin.
Shu sababli, kelasi haftalarda uning kelajagi bo‘yicha aniq qaror qabul qilinishi kutilmoqda.
