"Brayton" jamoasining yarim himoyachisi Karlos Baleba "Manchester Yunayted" uchun transfer bozorida asosiy maqsadlardan biri hisoblanadi. Bu haqida Euro-football.ru xabar berdi.
Ma’lumotlarga ko‘ra, mankunianliklar yosh futbolchini o‘z saflariga qo‘shib olishga jiddiy qiziqish bildirmoqda. Joriy haftada "Manchester Yunayted" vakillari 21 yoshli kamerunlik futbolchining vakillari bilan uchrashib, uning maoshi va shartnomaning boshqa tafsilotlarini muhokama qilishdi.
Mashhur futbol jurnalisti Fabrizio Romano bergan xabarga ko‘ra, "Manchester Yunayted" dastlab Baleba bilan barcha shartlarni kelishib olmoqchi, shundan so‘ng "Brayton" klubi bilan rasmiy muzokaralarni boshlashni rejalashtirgan. Shu bilan birga, "Brayton" klubi Karlos Balebani sotishni istamayotgani ma’lum qilindi.
Klub futbolchi uchun juda yuqori narx so‘ramoqda. Ayrim manbalarga ko‘ra, "Brayton" Baleba uchun kamida 115 million yevro talab qilmoqda.
Transfermarkt saytida esa futbolchining narxi 40 million yevro deb baholangan. Shu sababli, muzokaralar davomida tomonlar o‘rtasida kelishuvga erishish oson bo‘lmasligi mumkin.
Biroq, "Manchester Yunayted" Balebani o‘z safiga qo‘shib olish uchun harakatlarni davom ettirmoqda.
