Ispaniya Qirollik futbol federatsiyasi rasmiy saytida eʼlon qilingan bayonotga ko‘ra, “Vilyarreal” va “Barselona” klublari La Liga 17-tur uchrashuvini AQSHda o‘tkazish bo‘yicha murojaat bilan chiqqan. Bu haqida Euro-football.ru xabar berdi.
Federatsiya dushanba kuni bo‘lib o‘tgan yig‘ilishda klublarning so‘rovini ko‘rib chiqishni ma’qulladi. Endilikda bu masala Yevropa futbol assotsiatsiyalari ittifoqi (UEFA) va Xalqaro futbol federatsiyasi (FIFA)ga yuboriladi.
Mazkur uchrashuv 20-dekabr, shanba kuni Mayami shahridagi “Hard Rok” stadionida o‘tkazilishi mumkin. Ma’lumot uchun, Ispaniya chempionati tarixida hali biror marta rasmiy o‘yin boshqa davlatda o‘tkazilmagan.
So‘nggi yillarda La Liga prezidenti Xaver Tebas chempionat doirasidagi bir uchrashuvni AQSHda o‘tkazish tashabbusi bilan faol shug‘ullanib kelmoqda. Bu borada zarur ruxsatlar olingach, mazkur o‘yin xorijda o‘tkazilishi mumkin.
