“Vilyarreal” va “Barselona” klublari La Liga doirasida dekabr oyida o‘tkazilishi rejalashtirilgan o‘zaro uchrashuvni AQSHda o‘tkazish uchun ruxsat so‘radi. Bu haqida Euro-football.ru xabar berdi.
Shu munosabat bilan Ispaniya Qirollik futbol federatsiyasi UEFA va FIFA tashkilotlariga murojaat qilib, o‘yinni Mayami shahrida o‘tkazish masalasini ko‘rib chiqishni so‘radi. Mazkur tashabbusga “Real Madrid” klubi o‘z munosabatini bildirdi.
Madrid klubi Ispaniya chempionati o‘yinlarini boshqa mamlakatda o‘tkazilishiga qarshi chiqmoqda. Klub vakillari bunday o‘yinlar chempionatning asosiy tamoyillariga, xususan, har bir jamoa o‘z maydonida va raqib maydonida bittadan o‘yin o‘tkazishi tartibiga zid ekanini ta’kidladi.
Ularning fikriga ko‘ra, bu holat musobaqadagi raqobat muvozanatini buzadi va “Barselona” hamda “Vilyarreal” klublariga asossiz ustunlik beradi. “Real Madrid” barcha jamoalar teng sharoitda bo‘lishi lozimligini qayd etdi.
Klub chempionat o‘yinini boshqa davlatda o‘tkazish qabul qilib bo‘lmaydigan holat ekanini va bu kelgusida jiddiy oqibatlarga olib kelishi mumkinligini ogohlantirdi. Shuningdek, “Real Madrid” UEFA, FIFA va Ispaniya oliy sport kengashiga murojaat qilib, chempionat o‘yinini AQSHda o‘tkazishga ruxsat bermaslikni so‘radi.
Klub eslatishicha, 2018 yilda milliy ligalar o‘yinlarini boshqa davlatda o‘tkazish qat’iyan taqiqlangan, faqat istisno holatlar bundan mustasno.
