PSJ jamoasining rossiyalik darvozaboni Matvey Safonov jamoani tark etish uchun ikki shartni aytib o‘tdi. Bu haqida Euro-football.ru xabar berdi.
Uning so‘zlariga ko‘ra, u faqat ikki holatda klubdan ketishga tayyor. Birinchi holat – agar klub rahbariyati undan jamoani tark etishni so‘rasa.
Ikkinchi holat esa – agar Yevropaning kuchli klublaridan biri unga asosiy tarkibda doimiy o‘rin kafolatini bersa. Ayni paytda Safonov Parijda qolishni istamoqda va klubda o‘z o‘rnini saqlab qolish uchun kurashishga tayyor ekanini bildirgan.
U mustaqil ravishda jamoani tark etishni kuchsizlik belgisi deb hisoblaydi. Shu bois, Safonov PSJda asosiy darvozabon bo‘lish uchun harakat qilish niyatida.
Avvalroq, PSJ rahbariyati unga hatto Donnarumma ketgan taqdirda ham asosiy darvozabon bo‘la olmasligini ma’lum qilgan edi. Ma’lumotlarga ko‘ra, Donnarumma jamoani tark etishi aniq va uning Angliyaning Manchester Siti klubiga o‘tishi kutilmoqda.
Shu sababli, Safonovning kelajagi hamon noaniq qolmoqda. U o‘z faoliyatini yuqori darajada davom ettirish uchun imkoniyatlarni ko‘rib chiqmoqda.
