Levandovskiy faoliyatidan to‘liq mamnunligini aytdi

Polsha hujumchisi Robert Levandovskiy o‘z faoliyati haqida gapirib, hech qanday afsuslari yo‘qligini ta’kidladi. Bu haqida Euro-football.ru xabar berdi.

Levandovskiy o‘z futbolchilik faoliyati davomida beshta yirik chempionatning faqat ikktasida, ya’ni Germaniya Bundesligasi va Ispaniya La Ligasida o‘ynagan. U Angliya Premer-ligasida ham o‘zini sinab ko‘rish imkoniyati bo‘lganini, ayniqsa “Manchester Yunayted” jamoasida to‘p surishni xohlaganini bildirdi.

Levandovskiy o‘z so‘zlarida, Angliya Premer-ligasida o‘ynash imkoniyati bo‘lmagani uchun afsuslanmasligini aytdi. Uning ta’kidlashicha, u “Borussiya Dortmund”, “Bavariya Myunxen” va “Barselona” klublarida o‘ynab, o‘z faoliyatidan to‘liq mamnun.

U o‘z hayotida hech qanday muhim imkoniyatni boy berganini yoki noto‘g‘ri qaror qabul qilganini his qilmasligini ta’kidladi. Ma’lumot uchun, Robert Levandovskiy 2022-yildan buyon “Barselona” klubi safida harakat qilmoqda.

U bunga qadar sakkiz yil davomida Germaniyaning “Bavariya” jamoasida o‘ynagan va ko‘plab sovrinlarni qo‘lga kiritgan. Levandovskiy o‘z mehnati va yutuqlari bilan xalqaro miqyosda tan olingan futbolchilardan biri hisoblanadi.