So‘nggi yillarda Yevropa va jahon futbol tashkilotlari – UEFA hamda FIFA – o‘zlari o‘tkazadigan musobaqalar sonini va ko‘lamini kengaytirishga alohida e’tibor qaratmoqda. Bu haqida Euro-football.ru xabar berdi.
Jumladan, Yevrokuboklar, Klublar o‘rtasidagi jahon chempionati va boshqa turli turnirlar kengaytirilmoqda. Endilikda UEFA Superkubogi ham kengaytiriladigan navbatdagi musobaqa bo‘lishi mumkin.
The Telegraph nashrining yozishicha, hozirgi vaqtda bitta o‘yin shaklida o‘tkaziladigan Superkubok kelgusida to‘rt jamoa ishtirok etadigan mini-turnir ko‘rinishiga o‘zgartirilishi mumkin. Hozircha ushbu yangi formatda yana ikki jamoa qanday tanlab olinishi bo‘yicha aniq ma’lumotlar yo‘q.
Mantiqan olganda, Chempionlar ligasi va Yevropa ligasi g‘oliblariga Konferensiyalar ligasi g‘olibi ham qo‘shilishi ehtimoli bor. To‘rtinchi jamoa esa hozircha noma’lum bo‘lib qolmoqda.
Shuningdek, manbaga ko‘ra, yangilangan UEFA Superkubogi Yevropadan tashqarida, masalan, AQSH yoki Yaqin Sharq mamlakatlarida o‘tkazilishi ham mumkin. Hozircha bu borada yakuniy qaror qabul qilinmagan.
Yangi format futbol ishqibozlari va mutaxassislar tomonidan katta qiziqish bilan kutilmoqda.
