Mbappe Gvardiola jamoasiga xet-trik qayd etgan oltinchi futbolchi bo‘ldi

Madridning "Real" klubi hujumchisi Kilian Mbappe Chempionlar Ligasi pley-off bosqichining "Manchester City"ga qarshi javob uchrashuvida xet-trik qayd etdi. Fransiyalik futbolchi birinchi bo‘limda ikki gol urgan bo‘lsa, 61-daqiqada uchinchi golni kiritib, hisobni 3:0 (ikki uchrashuv natijasiga ko‘ra 6:2) ko‘rinishiga keltirdi.

MisterChip ma’lumotlariga ko‘ra, Mbappe Gvardiola boshqaruvidagi jamoalarga qarshi xet-trik qayd etgan oltinchi futbolchiga aylandi. Bungacha bu natijaga quyidagi futbolchilar erishgan:

Serxio Aguero (2014),
Lionel Messi (2016),
Jeymi Vardi (2016 va 2020),
Kristofer Nkunku (2021),
Viktor Dyokeresh (2024).

Mbappe "Real"dagi ilk mavsumini o‘tkazmoqda. U bunga qadar "PSJ" safida to‘p surgan.

Xosep Gvardiola 2016-yildan buyon "Manchester City"ni boshqarib kelmoqda. Unga qadar esa "Barselona" va "Bavariya" klublarida ishlagan.