Xans-Diter Flik: «Klasikoda biz faqat g‘alaba uchun maydonga tushamiz»
11 may kuni Ispaniya La Ligasining 35-turida butun jahon e’tiborida bo‘ladigan mashhur «El Klasiko» o‘yini bo‘lib o‘tadi. Unda «Barselona» o‘z maydonida ashaddiy raqibi – «Real Madrid»ni qabul qiladi. Ushbu muhim bahs arafasida kataloniyaliklar bosh murabbiyi Xans-Diter Flik jamoasining hozirgi ahvoli va bo‘lajak bahs haqida o‘z fikrlarini ochiqladi.
«Inter»ga qarshi Chempionlar Ligasidagi og‘riqli mag‘lubiyatdan so‘ng, jamoadagi vaziyat yaxshilandi. Biz albatta, oson bo‘lmasligini yaxshi tushunamiz, ammo ayni paytda vaziyatni to‘g‘ri yo‘lga qo‘yish va maqsadlarga erishish uchun barcha choralarni ko‘ryapmiz. Biz nimani xohlayotganimizni aniq bilamiz va buni maydonda isbotlashimiz kerak. Hozir biz uchun faqat «klasiko» muhim, chunki bu jamoaning ruhiyati uchun katta ahamiyatga ega», – dedi Flik.
Germaniyalik mutaxassis asosiy tarkibga oid bir qator savollarga ham javob berib o‘tdi:
«Menimcha, Robert Levandovski va Alexandro Baldeni boshidanoq asosiy tarkibda maydonga tushirishim qiyin. Hozircha ularning holati haqida to‘liq ishonchim yo‘q. Shu bilan birga, Jerar Martin va boshqa futbolchilar juda yaxshi formada ekanini ko‘rsatishyapti. Oldinda yana uchta muhim bahs bor va ehtimol, Levandovski va Balde ikkinchi bo‘limda maydonga tushirilar».
Flik, shuningdek, Chempionlar Ligasidan chiqib ketgandan keyin jamoada paydo bo‘lgan psixologik holat haqida ham to‘xtalib o‘tdi:
«Bunday holatlarda futbolchilar bilan ochiq gaplashish, ularning ruhiyatini tiklash va keyingi maqsadlar haqida fikr almashish juda muhim. Biz ham shunday qildik. «El Klasiko» – bu oddiy o‘yin emas, unda 100 foiz kuch bilan maydonga tushish zarur. Biz faol o‘ynashni, to‘pni nazorat qilishni va muxlislarimizning qo‘llab-quvvatlashidan maksimal darajada foydalanishni istaymiz. Bu juda muhim», – deb qo‘shimcha qildi murabbiy.
Murabbiyning ta’kidlashicha, «Real Madrid»ning juda kuchli jamoa ekanini tan olgan holda, «Barselona» faqat g‘alaba uchun maydonga tushadi:
«Raqibimizning kuchini inkor etmayman, «Real» – ajoyib va fantastik jamoa. Biroq biz o‘z uyimizda o‘ynayapmiz va o‘z muxlislarimiz oldida g‘alaba qozonishni istaymiz. Agar futbolchilardan so‘rasangiz, ular har qanday vaziyatda ham «klasiko»da g‘alaba qozonishni xohlashadi. Bu o‘yinning natijasi biz uchun prinsipial ahamiyatga ega, turnir jadvali va mavsumdagi vaziyat hozircha muhim emas. Biz faqat shu bahsga diqqatni qaratganmiz va g‘alaba uchun bor kuchimizni sarflashga tayyormiz», – deya so‘zini yakunladi Flik.
Eslatib o‘tamiz, «Barselona» va «Real Madrid» o‘rtasidagi «El Klasiko» 11 may kuni «Kamp Nou» stadionida bo‘lib o‘tadi. Ushbu o‘yin natijasi musobaqa jadvalidagi holatni sezilarli darajada o‘zgartirishi mumkin.
