Jahon chempionati–2026 saralash bosqichi doirasida tarixiy yutuq qayd etgan Indoneziya terma jamoasi futbolchilari davlat rahbarining maxsus e’tirofi bilan taqdirlandi. Xususan, Xitoy ustidan 1:0 hisobida qozonilgan muhim g‘alabadan so‘ng, mamlakat prezidenti Prabovo Subianto terma jamoaning barcha a’zolariga luks toifadagi Rolex GMT-Master II soatini sovg‘a qildi.
Indoneziya OAVlarining xabar berishicha, har bir soatning bozordagi narxi taxminan 193 million rupiya, ya’ni 150 million so‘m atrofida bo‘lib, bu mamlakatdagi o‘rtacha oylik maoshning bir necha baravariga to‘g‘ri keladi.
Bu hadya orqali prezident futbolchilarga jonbozlik va o‘z Vatanini xalqaro miqyosda munosib targ‘ib etgani uchun minnatdorlik bildirdi. Bunday ishonch va rag‘bat mamlakatda futbol rivojiga ijobiy ta’sir ko‘rsatishi kutilmoqda.
Ayni paytda Indoneziya terma jamoasi JCH–2026 saralashining uchinchi bosqichida C guruhida to‘rtinchi o‘rinni egallab turibdi. Shunga qaramasdan, jamoa keyingi bosqichga yo‘llanmani oldindan kafolatlab bo‘lgan.
Ta’kidlash joiz, Indoneziya so‘nggi yillarda milliy futbol rivojiga katta sarmoya va e’tibor qaratayotgan mamlakatlardan biri sifatida e’tirof etilmoqda. Davlat darajasidagi bunday e’tirof va rag‘bat esa futbolchilarning motivatsiyasiga katta turtki bo‘lishi shubhasiz.
