Lamin Yamalning maoshi nima uchun 15 million yevro?

“Barselona” klubi sport direktori Deku yosh yulduz — Lamin Yamalning maoshi atrofida paydo bo‘lgan savollarga javob berdi. Ma’lumki, 17 yoshli hujumchi bir oydan so‘ng 18 yoshga to‘ladi va yangi shartnoma asosida har yili 15 million yevro ish haqi oladi. Bu ko‘pchilikda qiziqish va bahslarga sabab bo‘ldi.

— Lamin Yamal — har 10-15 yilda tug‘iladigan favqulodda iste’dod egasi. U nafaqat texnika, balki aql, harakat va yetakchilik jihatidan ham o‘z tengdoshlaridan yuza berk turibdi, — dedi Deku. — Uning yoshi 17 yoki 27 bo‘lishi muhim emas. Biz “Barsa”da futbolchi qanday ishlayotgani orqali uning qiymatini baholaymiz. Lamin esa o‘z o‘yini bilan bu maoshga munosib ekanini namoyish qilmoqda.

Yakunlangan mavsumda Yamal “Barselona”ning barcha turnirlardagi 55 o‘yinida ishtirok etib, 18 ta gol va 25 ta assist bilan muxlislarni hayratga soldi. Bu natijalar uni faqat yosh yulduz sifatida emas, balki yetakchi futbolchi sifatida ham namoyon qildi.

Dekuning so‘zlariga ko‘ra, klub futbolchining yoshiga emas, uning maydondagi ta’siri va natijasiga qarab qaror qabul qiladi. Lamin Yamalning 2031 yilgacha amal qiladigan shartnomasi “Barsa”ning unga bo‘lgan ishonchi va kelajak rejalari ramzidir.

Bunday iste’dodlar ko‘p tug‘ilmaydi. Shuning uchun “Barselona” uni o‘z safida saqlab qolish uchun barcha shart-sharoitni yaratishga tayyor. Lamin Yamal esa bu ishonchni har bir o‘yinda o‘z o‘yini bilan oqlamoqda.