O‘zbekiston milliy terma jamoasining 2026 yilgi Jahon chempionatiga yo‘llanma olgani va legionerlarimizning Yevropadagi muvaffaqiyatli faoliyati o‘zbek futbolchilariga bo‘lgan qiziqishni ancha oshirdi. Italiyadagi Eldor Shomurodov, Fransiya va Angliyada porlayotgan Abduqodir Husanov fonida endi ko‘zlar Abbosbek Fayzullayev tomon qaratila boshladi.
21 yoshli hujumkor yarim himoyachi allaqachon Osiyoning eng yosh iqtidorlaridan biri sifatida tan olingan. Rossiyaning SSKA klubidagi muvaffaqiyatli o‘yinlari, terma jamoa safida ko‘rsatayotgan ta’sirli harakatlari tufayli Yevropa klublari uni diqqat markaziga olmoqda. 2023 yilning yozida “Paxtakor”dan SSKAga ko‘chib o‘tgan Fayzullayev Rossiya Premer-ligasining debyut mavsumidayoq jamoasi bilan bronza medali va mamlakat kubogini qo‘lga kiritdi. Ushbu mavsumda Abbos 39 o‘yinda 3 ta gol va 8 ta assist bilan ishtirok etdi.
Endi esa uning nomini Angliya Premer-ligasining nufuzli klubi “Vulverxempton” transfer ro‘yxatida ko‘rishimiz mumkin. Internet va ijtimoiy tarmoqlarda tarqalgan ma’lumotlarga qaraganda, jamoa bosh murabbiyi Vitor Pereyra tomonidan tuzilgan va o‘z qo‘li bilan yozilgan asosiy transfer ro‘yxatida Abbosbekning ismi ham mavjud.
Bu ro‘yxatdagi birinchi nom “Xetafe” klubi safidagi nigeriyalik Kristantus Uche bo‘lsa, Abbos Fayzullayev ikkinchi o‘rinda turibdi. Bu esa uning nafaqat ehtimoliy transfer sifatida, balki jiddiy nomzod sifatida ko‘rilayotganini anglatadi. Jurnalist Yahyoxo‘ja Ulug‘xo‘jayev o‘z fikrida bu xabarda mantiqiy asos borligini ta’kidlab, Abbosning SSKA bilan bitimi tugash arafasida ekaniga e’tibor qaratdi.
– U SSKA bilan shartnomani yangilamadi. Shu sabab u joriy transfer oyida Yevropa yo‘liga otlanishi mumkin. Bunda “Vulverxempton”ning qiziqishi mantiqan o‘rinli. Fayzullayev potensiali bor futbolchi va u o‘sishda davom etmoqda, – deydi Ulug‘xo‘jayev.
Abbosning o‘zi esa bu kabi gaplarga to‘g‘ri yondashadi. Uning fikricha, har qanday futbolchining orzusi Yevropaning taniqli klublarida to‘p surishdir.
– Ayni paytda SSKA futbolchisiman va klub bilan shartnomam bor. Ammo maqsadim aniq – Yevropada, top-klublarda o‘ynash. Xudo nasib qilsa, bu orzu ro‘yobga chiqadi, – degan edi Fayzullayev yaqindagi intervyularidan birida.
Shu bilan birga, u terma jamoa safida ham o‘z salohiyatini yaqqol namoyon etmoqda. Hozirgacha Abbosbek O‘zbekiston milliy terma jamoasi safida 27 marta maydonga tushib, 8 ta gol urgan. U jahon chempionati saralash bosqichida ham muhim gollari bilan yorqin ajralib turdi.
Xulosa o‘rnida: Abbosbek Fayzullayevning Angliya Premer-ligasi yo‘li – bu nafaqat futbolchi uchun yangi bosqich, balki o‘zbek futbolining xalqaro miqyosdagi nufuziga ham xizmat qiladigan muhim transfer bo‘lishi mumkin. “Vulverxempton” singari klubdagi imkoniyat unga faqat o‘sish va yangi imkoniyat eshiklarini ochishi turgan gap. Kelajakda uni top-5 chempionatlarda ko‘rish – endi orzu emas, balki real ehtimol.
