«Inter Mayami» Madridning «Atletiko» klubida o‘ynaydigan yarim himoyachi Rodrigo de Paulni xarid qilish bo‘yicha muzokaralarni yakunlash arafasida turibdi. Bu haqida Euro-football.ru xabar berdi.
31 yoshli futbolchi allaqachon «Inter Mayami» taklifiga rozilik bildirgan, endi qaror klublar qo‘lida. Mashhur jurnalist Fabrizio Romano ma’lumotiga ko‘ra, tomonlar o‘rtasidagi muzokaralar tez sur’atlarda rivojlanmoqda va yangi kelishuvga erishish yaqinlashmoqda.
Rodrigo de Paulning «Atletiko» bilan amaldagi shartnomasi kelgusi yil o‘rtalarida yakunlanadi. Tarqalgan xabarlarga ko‘ra, argentinalik o‘yinchini sotib olish talabini Lionel Messi bildirgan, u yarim himoyachini milliy jamoa safidagi hamkorligi sabab yaxshi biladi.
Mutaxassislar fikricha, de Paulning «Inter Mayami» jamoasiga kelishi klubning Messiga shartnomani yangilash bo‘yicha muzokaralarida imkoniyatlarini sezilarli darajada oshiradi. Bu transfer jamoa uchun muhim qadam bo‘lib, kelgusida yuqori natijalarga erishishda yordam beradi.
