Bilbao shahrining Atletik jamoasi himoyachisi Yeray Alvares o‘zining ijtimoiy tarmoqlarida unga doping moddasi topilgani haqidagi xabar bilan bog‘liq fikrini bildirdi. Bu haqida Euro-football.ru xabar berdi.
Yevropa Ligasi doirasidagi Manchester Yunaytedga qarshi o‘yin so‘ngida olingan test natijasi musbat chiqqan. Futbolchi bunday xabarni olish juda og‘ir zarba ekanini ta’kidladi.
U yuzaga kelgan holatni soch to‘kilishiga qarshi davolanish bilan izohladi. Alvares saraton kasalligidan so‘ng turli dori vositalarini qabul qilganini aytdi.
Tekshiruv davomida ulardan birining tarkibida taqiqlangan modda borligi aniqlangan. Hozirda u vaqtinchalik musobaqalardan chetlashtirilgan.
O‘tgan mavsumda markaziy himoyachi sifatida maydonga tushgan Alvares barcha turnirlarda jami 29 o‘yin o‘tkazib, 7 ta sariq va 1 ta qizil kartochka olgan, shuningdek, 2 ta gol urgan.
