Apple top-menejeri: «iPhone kelgusi 10 yil ichida ahamiyatini yo‘qotishi mumkin»

Apple kompaniyasining eng mashhur va eng ko‘p foydalaniladigan gadjetlaridan biri — iPhone kelajakda o‘z mavqeini yo‘qotib, hatto iPod kabi tarix sahifalariga ko‘milib qolishi mumkin. Bu haqda kompaniyaning internet xizmatlari bo‘yicha vitse-prezidenti Eddi Kyu AQSHda o‘tkazilayotgan sud eshituvlari jarayonida ma’lum qildi, deb xabar beradi The Verge nashri.

Mazkur sud muhokamalari AQSH hukumatining Google va Apple o‘rtasidagi o‘zaro hamkorlik bitimi haqidagi tergovi doirasida bo‘lib o‘tmoqda. Google har yili Apple'ga taxminan 20 milliard dollar to‘lab, iPhone smartfonlarida asosiy qidiruv tizimi maqomini saqlab kelmoqda. Ayni shu masala bo‘yicha o‘z fikrlarini bildirayotgan Apple yuqori lavozimli vakili, sun’iy intellekt kabi yangi va innovatsion texnologiyalarning rivojlanishi natijasida smartfonlar va ulardagi an’anaviy qidiruv tizimlari ham o‘z dolzarbligini yo‘qotishi ehtimolini ta’kidladi.

Eddi Kyuning fikricha, dunyo texnologik taraqqiyotning shunday nuqtasida turibdiki, an’anaviy qurilmalarning o‘rnini sun’iy intellekt boshqaruvidagi yangicha texnologiyalar egallashi mumkin:

«Biz neft kompaniyasi yoki tish pastasi ishlab chiqaruvchi zavod emasmiz, ular abadiy talabga ega. Garchi bu ajabtovur eshitilsa-da, ehtimol, sizlarga 10 yildan keyin iPhone umuman kerak bo‘lmay qoladi», — dedi Kyu.

Apple vitse-prezidentining ta’kidlashicha, bu kabi vaziyat kompaniya tarixida avval ham kuzatilgan. Masalan, 2000-yillarning boshida kompaniyaning asosiy mahsuloti sifatida bozorga kirib kelgan va ommaviy mashhurlikka erishgan iPod pleyerlari keyinchalik aynan iPhone qurilmalari paydo bo‘lishi bilan o‘z ahamiyatini butkul yo‘qotgan edi. Apple hatto bu o‘zgarishni ataylab amalga oshirgan edi:

«O‘sha paytda biz o‘zimiz yaratgan iPod'ni yana o‘zimiz chiqargan iPhone qurilmasi bilan yo‘q qilgan edik. Hozir esa navbat iPhone'ga yetib kelishi mumkin», — deb tushuntirdi Kyu.

Hozirgi kunda iPhone Apple kompaniyasining eng asosiy va eng yirik daromad manbai hisoblanadi. Bu qurilmalar kompaniyaning har yillik umumiy daromadining katta qismini tashkil etadi. Lekin Apple bugungi kunda iPhone'ga teng va undan ham kuchliroq daromad manbasi topishda qiyinchiliklarga uchramoqda. Xususan, kompaniyaning elektromobillar ishlab chiqarishga urinishi muvaffaqiyatsiz yakunlandi, VR-garnituralari bozoriga kirib kelish esa kompaniyaning umid qilganidek natija bermadi.

Shu bilan birga, Apple robototexnika va sun’iy intellekt sohasidagi tadqiqotlarga katta sarmoya kiritmoqda. Kompaniya, shuningdek, kelajakda iPhone o‘rnini bosishi mumkin bo‘lgan yangi avlod qurilmalari, masalan, aqlli ko‘zoynaklar ishlab chiqarish ustida ham faol ish olib bormoqda.

Aytish lozimki, boshqa kompaniyalar ham sun’iy intellekt va uning atrofidagi yangicha texnologiyalar yordamida smartfonlardan voz kechishga bir necha bor urinib ko‘rishgan. Lekin hozircha bu borada ko‘pchilik muvaffaqiyatsizlikka uchragan. Xususan, Humane AI Pin deb nomlangan sun’iy intellekt asosidagi aqlli peyjer loyihasi atigi bir yil davomida faoliyat yuritib, keyin yopilgan bo‘lsa, Rabbit R1 qurilmasidan foydalanganlarning 95 foizi qurilmani bir yil ichida tashlab qo‘yishgan.

Biroq, Apple kompaniyasi o‘zining texnologik va moliyaviy imkoniyatlari bilan bu tendensiyani o‘zgartirish va yana bir bor texnologik dunyoni larzaga solishi ehtimoldan xoli emas.

Xo‘sh, kelajakda iPhone o‘rnini sun’iy intellektli yangi qurilmalar egallaydimi yoki smartfonlar davri hali uzoq davom etadimi — buni vaqt ko‘rsatadi. Ammo bir narsa aniqki, bu o‘zgarish jarayonida Apple muhim rol o‘ynashi mumkin.