Afrosiyob poyezdlari uchun 80 mln yevrolik shartnoma imzolandi
Ispaniyaning Talgo kompaniyasi O‘zbekiston temiryo‘l tizimi bilan navbatdagi muhim kelishuvga erishdi. Bu haqda Zamin.uz xabar berdi.
Mazkur shartnoma doirasida kompaniya Afrosiyob yuqori tezlikdagi poyezdlariga uzoq muddatli texnik xizmat ko‘rsatishni amalga oshiradi. Bu haqda upl.uz xabar beradi.
Shartnoma qiymati 80 million yevroga baholanib, kelgusi 10 yilni qamrab oladi. Ushbu kelishuv Talgo 250 rusumidagi olti tarkibni qamrab oladi.
Mazkur poyezdlar O‘zbekistondagi tezkor temiryo‘l qatnovining asosiy qismi hisoblanadi. Afrosiyob brendi yo‘lovchilar va sayyohlar orasida yaxshi tanilgan bo‘lib, Ispaniya tomoni ushbu loyihani mintaqadagi eng yirik servis kelishuvlaridan biri sifatida ko‘rmoqda.
Talgo va O‘zbekiston temiryo‘l tizimi o‘rtasidagi hamkorlik 15 yildan oshgan. Hamkorlikning dastlabki bosqichi Toshkent – Samarqand yo‘nalishida yuqori tezlikdagi poyezdlar qatnovini yo‘lga qo‘yish bilan boshlangan edi.
Yangi shartnoma esa poyezdlarning butun texnik xizmat ko‘rsatish jarayonini, ya’ni ularning “hayot sikli”ni qamrab oladi. Kelishuvga ko‘ra, Talgo mutaxassislari poyezdlarning texnik shayligini doimiy ravishda ta’minlaydi.
Bu jarayonda rejalashtirilgan texnik ko‘riklar, tizimlarning diagnostikasi va murakkab ta’mirlash ishlari amalga oshiriladi. Shuningdek, original ehtiyot qismlar muntazam yetkazib berib turiladi.
Bu esa poyezdlarning bekor turishi xavfini kamaytirib, yo‘lovchi tashish xavfsizligini yuqori darajada saqlash imkonini beradi. Afrosiyob poyezdlari o‘ziga xos texnologik yechimlarga ega.
Jumladan, kuzovning passiv og‘ish tizimi burilishli uchastkalardan odatdagidan 20-30 foiz tezroq o‘tishni ta’minlaydi. Shu bilan birga, yo‘lovchilarning qulayligi va xavfsizligi saqlanib qoladi.
