Consumer Reports tomonidan olib borilgan so‘nggi tadqiqotga ko‘ra, 2025 yildagi eng ishonchli avtomobil ishlab chiqaruvchilari ro‘yxati e’lon qilindi. Ushbu reyting 2000 yildan 2025 yilgacha bo‘lgan davrda 300 mingdan ortiq transport vositalari haqidagi ma’lumotlar asosida shakllantirilgan.
Yangi reyting tuzishda mutaxassislar so‘nggi 12 oy ichida qayd etilgan buzilishlar, nosozliklar va ularning jiddiylik darajasini hisobga oldi. Ishonchlilik darajasi 100 ball tizimida baholanib, eng mustahkam va ishonchli brendlar aniqlandi.
Subaru – yangi yetakchi!
Ko‘p yillar davomida Toyota va Lexus eng ishonchli avtomobillar ishlab chiqaruvchilari sifatida e’tirof etib kelingan edi. Biroq bu gal Subaru ularni ortda qoldirib, reytingda birinchi o‘rinni qo‘lga kiritdi.
Eng ishonchli avtomobil brendlari (2025 yil):
1. Subaru – 68 ball
2. Lexus – 65 ball
3. Toyota – 62 ball
4. Honda – 59 ball
5. Acura – 55 ball
6. Mazda – 55 ball
7. Audi – 54 ball
8. BMW – 53 ball
9. Kia – 51 ball
10. Hyundai – 50 ball
11. Buick – 48 ball
12. Nissan – 48 ball
13. Ford – 44 ball
14. Genesis – 40 ball
15. Volvo – 38 ball
16. Chevrolet – 37 ball
17. Tesla – 36 ball
18. Volkswagen – 34 ball
19. Jeep – 33 ball
20. GMC – 33 ball
21. Cadillac – 27 ball
22. Rivian – 14 ball
Subaru nega yetakchi bo‘ldi?
Subaru kompaniyasi so‘nggi yillarda ishonchlilikni yaxshilashga katta e’tibor qaratdi. Ayniqsa, Forester va Impreza modellari umumiy reytingda yuqori natijalarni qayd etdi. Shuningdek, Crosstrek, Legacy, Outback va Ascent modellari ham yuqori ishonchliligi bilan ajralib turdi.
Consumer Reports tahliliy guruhi vakili Stiven Elek bu haqda shunday deydi:
"Subaru avtomobillarida ishonchlilikni ta’minlash uchun aniq strategiya mavjud. Kompaniya yangi modellar ishlab chiqarishda o‘zgarishlarni bosqichma-bosqich amalga oshiradi va mustahkam tizimlarni saqlab qoladi. Bu esa yangi texnik muammolar xavfini kamaytiradi."
Toyota va Lexus: ustunlikni boy berdimi?
Toyota va Lexus ushbu reytingda o‘z o‘rnini saqlab qolgan bo‘lsa-da, Subaru kompaniyasining oldinga chiqishi ularning yetakchilik pozitsiyasini kamaytirdi. Shunday bo‘lsa-da, Toyota (62 ball) va Lexus (65 ball) hali ham eng ishonchli avtomobillar ishlab chiqaruvchilari qatorida qolmoqda.
Chevrolet, Tesla va Rivian nega reytingda past?
Chevrolet (37 ball), Tesla (36 ball) va Rivian (14 ball) reytingning eng quyi o‘rinlarini egalladi. Bu brendlar avtomobillarida kuzatilgan ishlab chiqarish muammolari, texnik nosozliklar va ishonchsiz komponentlar ularning past ball olishiga sabab bo‘ldi.
2025 yilda ishonchli avtomobil sotib olishni rejalashtirayotgan xaridorlar uchun ushbu reyting muhim qo‘llanma vazifasini o‘taydi.
