Chevrolet Onix xavfsizlik mojarosi tufayli katta jarimaga tortilishi mumkin

Braziliyada Chevrolet Onix avtomobillari bilan bog‘liq mojaro avj olmoqda, deb daily-motor.ru xabar bermoqda. General Motors kompaniyasiga 2012-2018 yillarda mamlakatda 1 milliondan ortiq xavfsiz bo‘lmagan avtomobillarni sotgani uchun jarima solinishi mumkin.

Braziliya Federal prokuraturasi General Motors’ni avtomobil egalari oldida javobgar qilishni talab qilmoqda. Agar sud da’voni qo‘llab-quvvatlasa, jabrlanganlarga 500 million AQSh dollari miqdorida kompensatsiya to‘lanishi kerak bo‘ladi.

Ishning asosiy jihati shundaki, Chevrolet Braziliya bozoriga mo‘ljallangan Onix modellarini qo‘shimcha xavfsizlik himoyasisiz sotgani, ammo eksport uchun ishlab chiqarilgan avtomobillarga qo‘shimcha himoya plitalari o‘rnatgani aytilmoqda.

2017-yilda Latin-NCAP mustaqil tashkiloti tomonidan o‘tkazilgan krash-test natijalariga ko‘ra, Chevrolet Onix yon tomondan urilish testida nol ball olgan. Shu sababli 2020-yilda kompaniyaga qarshi sudga murojaat qilingan.

General Motors esa Latin-NCAP tashkiloti hukumat tomonidan tartibga solinadigan organ emasligini va uning natijalari rasmiy xavfsizlik standartlari emasligini ta’kidlamoqda.

Braziliya bozoridagi boshqa mashhur modellar ham o‘xshash past xavfsizlik baholariga ega bo‘lgan:
* Renault Sandero, Renault Logan, Hyundai HB20,
* Citroen C3, Citroen C3 Aircross, Ford Ka, Fiat Argo.

Biroq, prokuratura aynan Chevrolet’ni nishonga olgan, garchi kompaniya Onix modeli ishlab chiqarilgan davrda u Braziliyaning rasmiy xavfsizlik talablariga javob berganini ta’kidlagan bo‘lsa ham.

Qizig‘i shundaki, mojaro boshlangandan keyin Chevrolet Braziliya bozoridagi Onix modellariga ham eksport avtomobillarida mavjud bo‘lgan qo‘shimcha xavfsizlik himoyasini o‘rnatdi.

General Motors rahbariyati esa sud jarayoni davom etayotganligi sababli izoh berishdan bosh tortdi.