Myanma va Tailandda kuchli zilzila sodir bo‘ldi (video)

28 mart kuni Myanma hududida 7,7 magnitudali kuchli zilzila sodir bo‘ldi. AQSH Geologiya xizmati ma’lumotiga ko‘ra, zilzila Mandalay shahridan 17,2 kilometr uzoqlikda, 10 kilometr chuqurlikda qayd etilgan. Yer silkinishlari Yangon, Bangkok va boshqa mintaqalarda ham sezildi.

Zilzila sodir bo‘lgan hududlarda qutqaruv ishlari boshlangan. Myanma hukumati qurbonlar va yirik vayronagarchiliklar haqida rasmiy ma’lumotlarni to‘plash bilan shug‘ullanmoqda. Birinchi zilziladan 12 daqiqa o‘tib, 6,4 magnitudali ikkinchi kuchli silkinish ham qayd etilgan.

Tailanddagi ahvol
Tailand poytaxti Bangkokda ham zilzila sezilarli bo‘lgan. Qurilayotgan binolardan biri qulab tushgan va kamida 43 nafar ishchi vayronalar ostida qolgani ma’lum qilindi.

Zilzila oqibatida:
? Aeroport va metro faoliyati vaqtincha to‘xtatildi;
? Odamlar ko‘p qavatli binolardan tashqariga chiqib ketdi;
? Baland binolardagi hovuzlardan suv toshib ketdi.

Qutqaruvchilar favqulodda ish rejimiga o‘tkazilgan va hozirda qurbonlar va jabrlanganlar soni haqida rasmiy ma’lumotlar to‘planmoqda.

Hukumat qanday choralar ko‘rmoqda?

Hozircha rasmiylar barcha zaruriy xavfsizlik choralarini ko‘rayotgani ma’lum qilingan. Kasalxonalardan bemorlar evakuatsiya qilingan, odamlar binolardan uzoqda joylashtirilmoqda. Vayronagarchiliklar miqyosi va jabrlanganlar haqida rasmiy ma’lumotlar kutilayapti.

Mavzu bo‘yicha yangilangan ma’lumotlar taqdim etilishda davom etadi.