Rossiyada xavfli jinoyat sodir etgan 27 yoshli Aleksey Rojkov tergov va sud jarayonlaridan so‘ng qat’iy jazoga mahkum etildi. Uning qilmishi mamlakatdagi xavfsizlik tizimiga tahdid sifatida baholandi. Markaziy okrug harbiy sudi Rojkovni 16 yil muddatga ozodlikdan mahrum etishga hukm qildi.
Rossiya Tergov qo‘mitasi ma’lumotlariga ko‘ra, 2022- yil 11- martga o‘tar kechasi Rojkov Sverdlovsk viloyatining Beryozovskiy shahrida joylashgan harbiy obyektga ataylab o‘t qo‘ygan. Bu harakat qasddan sodir etilgan va uning maqsadi davlatning harbiy salohiyatiga zarba berish bo‘lgan.
Yuqori xavfli bu ishdan so‘ng Rojkov internet orqali chiqish qilib, o‘z qilmishini ochiq tan olgan va omma oldida Rossiya Qurolli Kuchlarini obro‘sizlantiruvchi, soxta ma’lumotlar tarqatgan.
Rojkov o‘sha paytda xorijda yashiringan bo‘lsa-da, uning manzili aniqlanib, hibsga olingan va Sverdlovsk viloyatiga yetkazilgan. Sud uni terrorchilik akti sodir etganlik, terrorizmni internetda oqlash va qalbaki ma’lumotlar tarqatish ayblari bo‘yicha javobgar deb topdi.
Sud qarorga ko‘ra, Rojkov dastlabki 5 yilni ozodlikdan mahrum qilish sharoitida o‘tkazadi, qolgan 11 yilini esa qattiq tartibli koloniyada o‘taydi.
Mazkur ish Rossiyada so‘nggi yillarda davlat xavfsizligi va harbiy obyektlar muhofazasiga oid choralar yanada kuchaytirilayotganini ko‘rsatadi. Mutasaddilar bu kabi holatlarga nisbatan qat’iy chora ko‘rilishini yana bir bor ta’kidlashdi.
