Ukraina va Rossiya o‘rtasidagi harbiy qarama-qarshilik tobora texnologik urush tusini olmoqda. Yaqinda ijtimoiy tarmoqlarda tarqalgan videoyozuvlarda Rossiya armiyasi xitoylik ishlab chiqaruvchilar tomonidan yaratilgan zamonaviy lazer qurilmalaridan foydalanayotgani aks etgan.
Ushbu qurilma "Sokin ovchi" deb nomlanadi va u past balandlikda harakatlanuvchi obyektlarni, jumladan, dronlarni aniqlash, kuzatish va yo‘q qilish maqsadida ishlab chiqilgan. Tizim maxsus yo‘ltanlamas harbiy texnika tomiga o‘rnatiladi va u transport vositasi ichidagi operator tomonidan boshqariladi.
Ushbu lazer qurilmasi dushmanning uchuvchisiz qurilmalarini 4,98 kilometr masofadan aniqlay oladi. 3,2 kilometr masofada dronlarning kuzatuv va navigatsiya tizimlarini ishdan chiqarib, 1,6 kilometr masofada ularni to‘liq yo‘q qilish imkoniyatiga ega.
Foto: The Telegraph
Mutaxassislarning ta’kidlashicha, ushbu qurilma 30 kilovatt quvvatga ega bo‘lib, 1000 metr masofada joylashgan va qalinligi 5 millimetr bo‘lgan po‘lat plastinasini sakkiz soniya ichida teshib o‘tadi.
Rossiya tomonidan tarqatilgan videoda lazer qurilmasi dronlarni nishonga olib, ularning uchish trayektoriyasini aniq kuzatib borib, keyin bir zumda yo‘q qilishi aks etgan. Videoda lazer qurilmasi Shedrik va Skywalker X8 rusumli ukrainalik dronlarni nishonga olgani ham qayd etilmoqda.
Harbiy ekspertlarning fikricha, bu qurilma Rossiyaning Ukrainaga qarshi keng ko‘lamli urush boshlanganidan beri Xitoydan olgan eng muhim va yuqori texnologiyali qurilmalaridan biri hisoblanadi.
Ushbu holat xalqaro kuzatuvchilar orasida turli bahslarga sabab bo‘lmoqda. Bir tarafdan, bu qurilmalar Rossiyaning mudofaa tizimini kuchaytirishi mumkin, boshqa tarafdan esa Xitoyning bu nizoda ishtiroki haqidagi bahslarni yanada kuchaytirishi ehtimoldan xoli emas.
Hozircha rasmiy Xitoy tomoni ushbu vaziyat bo‘yicha izoh bermagan. Ammo ekspertlar bu texnologik hamkorlik xalqaro hamjamiyatda katta qiziqish uyg‘otishini taxmin qilmoqda. Bugungi kunda yuqori texnologiyali qurollarning ushbu nizoda qo‘llanishi Rossiya va Ukraina o‘rtasidagi qarama-qarshilikni yangi bosqichga ko‘tarmoqda, bu esa vaziyatning yanada murakkablashishiga olib kelishi mumkin.
