Rossiya Zelenskiy va Tramp janjaliga qanday munosabat bildirdi?

^{Foto: “RBK”}
AQSH prezidenti Donald Tramp va Ukraina rahbari Vladimir Zelenskiy o‘rtasidagi bahs-munozaraga Rossiya prezidenti matbuot kotibi Dmitriy Peskov munosabat bildirdi. Bu haqda “Radio mayak” xabar berdi.

"28 fevral kuni Oq uyda sodir bo‘lgan voqea Ukraina atrofidagi vaziyatni hal qilish yo‘liga chiqish qanchalik qiyin bo‘lishini yaqqol ko‘rsatdi. Kiyev rejimi va Zelenskiy tinchlikni istamaydi. Ular urushning davom etishini xohlaydi. Shuning uchun bu vaziyatda faqat Vashingtonning sa’y-harakatlari va Moskvaning tayyorgarligi yetarli bo‘lmaydi. Juda muhim element qolib ketmoqda", dedi Peskov.

U “G‘arb o‘z jamoaviyligini qisman yo‘qota boshlagani”ni va prezident Vladimir Putin mojaroning “barcha nozik jihatlari”dan xabardorligini aytdi.

"Shubhasiz, u sodir bo‘lgan voqeaning mohiyatini yaxshi biladi. Ayniqsa, uning barcha tafsilotlari butun jahon jamoatchiligi uchun ochiq edi. Shu bois prezident uning barcha nozik jihatlaridan xabardor. Bu g‘oyatda g‘ayrioddiy voqea bo‘ldi va Zelenskiy ko‘p jihatdan, eng kamida, diplomatik qobiliyatlari yo‘qligini namoyon etdi", dedi Peskov.

U, shuningdek, Putinning Oq uydagi mojaroga munosabati haqida so‘zladi:

"U sodir bo‘lgan voqeani inobatga oldi va yana bir bor butun Rossiya tomoni Putinning haqligiga amin bo‘ldi. Putin Rossiya tomonining muzokaralar jarayoniga ochiqligiga qaramay, vaziyat Kiyev rejimining bunday jarayonni qo‘llab-quvvatlashni istamasligiga borib taqalayotganini ta’kidlagan edi. Biz buni Vashingtonda to‘liq namoyon bo‘lganini ko‘rdik", dedi Kreml matbuot kotibi.

Tramp va Zelenskiyning uchrashuvi 28 fevral kuni Vashingtonda bo‘lib o‘tdi va mojaro bilan yakunlandi, shu sababli Ukraina prezidenti Oq uyni muddatidan oldin tark etdi. AQSH va Ukraina o‘rtasidagi nodir metallar bo‘yicha kelishuv janjal tufayli bekor qilindi. Xususan, Tramp Zelenskiyni “uchinchi jahon urushi bilan o‘ynashish”da va tinchlikka tayyor emaslikda aybladi. Yevropa yetakchilari Ukraina rahbarini ommaviy ravishda qo‘llab-quvvatladi.