O‘zbekistonda ekologik barqarorlik va energiya tejovchan uy-joylar konsepsiyasini amaliyotga joriy etish maqsadida Fransiya taraqqiyot agentligi (AFD) tomonidan moliyaviy va texnik yordam ko‘rsatilishi kutilmoqda. Mazkur hamkorlik doirasida AFD O‘zbekiston ipotekani qayta moliyalashtirish kompaniyasiga 30 million yevro miqdorida kredit ajratishi rejalashtirilgan.
Energetika vazirligi tarqatgan rasmiy ma’lumotga ko‘ra, loyiha O‘zbekistonda turar-joy binolarining energiya samaradorligini oshirish maqsadida ishlab chiqilmoqda. Ayni vaqtda loyiha bo‘yicha baholash va tayyorgarlik jarayonlari olib borilayotgani qayd etilgan.
Hujjatga ko‘ra, Fransiyaning ushbu agentligi tomonidan taqdim etiladigan kredit liniyasi va texnik ko‘mak orqali tijorat banklari vositasida yakuniy iste’molchilar — aholi va xususiy sektor subyektlariga qulay shartlarda kreditlar taqdim etilishi rejalashtirilgan. Bunda mablag‘lar asosan energiya tejaydigan texnologiyalar bilan jihozlangan yoki shunday texnologiyalarni joriy etishni reja qilgan turar-joylarga yo‘naltiriladi.
Loyiha doirasida fuqarolarning energiya tejash bo‘yicha bilim va munosabatini o‘rganish uchun onlayn tarzda maxsus so‘rovnoma ham o‘tkazilmoqda. Mazkur savolnoma fransuz kompaniyalari – Juru va AETS mutaxassislari tomonidan tayyorlangan bo‘lib, u orqali yig‘ilgan ma’lumotlar loyihaning iqtisodiy va texnik asoslarini shakllantirishga xizmat qiladi.
Energetika vazirligi bu tashabbus nafaqat aholining elektr energiyasiga bo‘lgan xarajatini qisqartirishi, balki umumiy ekologik muhitni yaxshilashiga ham ishonch bildirmoqda.
Umuman olganda, AFD bilan ushbu strategik hamkorlik O‘zbekistonda barqaror uy-joy siyosati va yashil iqtisodiyotga o‘tish jarayonida muhim qadam sifatida baholanmoqda. Mazkur loyiha amalga oshishi orqali nafaqat yurtdoshlarimiz o‘z energiya xarajatlarini qisqartirish imkoniga ega bo‘ladilar, balki mamlakatdagi ekologik madaniyat ham yanada yuksalishi kutilmoqda.
