7 may kuni Samarqand viloyati Kattaqo‘rg‘on tumanida joylashgan avtomobillarga yoqilg‘i quyish shoxobchasida mudhish yong‘in sodir bo‘ldi. Bu haqda Sanoat, radiatsiya va yadro xavfsizligi qo‘mitasi rasman ma’lum qildi.
Hodisa Qushtepa mahallasida joylashgan AYOQSH hovlisida, soat taxminan 15:06 da qayd etilgan. Yonilg‘i saqlanadigan 10 kub metrli ikki rezervuardan birida “ZIL” rusumli yuk mashinasiga solyarka quyilayotgan paytda chaqnash sodir bo‘lgan. Kutilmagan yong‘in shiddati bilan tez tarqalgan.
Dastlabki ma’lumotlarga ko‘ra, ushbu falokat oqibatida ikki nafar fuqaro halok bo‘lgan. Yana bir kishi og‘ir jarohatlar bilan shifoxonaga yetkazilgan va ayni paytda tibbiy nazorat ostida.
Hodisa joyida tegishli idoralar, yong‘in o‘chiruvchilar va huquqni muhofaza qiluvchi organlar ish olib borishdi. So‘ngida yoqilg‘i saqlanuvchi sisternalar, texnik uskunalar va ayrim avtomashinalarga zarar yetgani qayd etilmoqda.
Hozirda sodir bo‘lgan yong‘inning aniq sabablari va mas’ul shaxslar yuzasidan tergov harakatlari boshlangan.
Bunday voqealar aholi orasida xavfsizlik madaniyatini oshirish va AYOQSHlardagi texnik nazoratni kuchaytirish zarurligini yana bir bor eslatadi.
Zamin.uz tahririyati ushbu fojeada halok bo‘lganlarning yaqinlariga chuqur hamdardlik bildiradi va jarohat olganlarga tez fursatda shifo tilaydi.
