2026 yilda OTBning yillik yig'ilishi Samarqandda o'tkaziladi
2026 yil 3–6 may kunlari Samarqand shahrida Osiyo taraqqiyot bankining (OTB) 59-yillik yig'ilishi bo'lib o'tadi, deb Kursiv.media xabar berdi. Bu O'zbekistonda ushbu nufuzli moliyaviy anjumanning ikkinchi marta o'tkazilishi bo'ladi — ilk bor 2010 yilda Toshkentda tashkil etilgan edi.
OTB prezidenti Masato Kanda yig'ilish Samarqandda o'tkazilishi mintaqaviy hamkorlik va barqaror rivojlanishni mustahkamlash uchun ilhom manbai bo'lishini ta'kidladi. Uning so'zlariga ko'ra, Samarqand o'zining boy tarixi va madaniy merosi bilan Osiyo va Tinch okeani mintaqasidagi hamkorlikni mustahkamlash uchun ideal joy hisoblanadi.
O'zbekiston Bosh vaziri o'rinbosari Jamshid Xo'jayevning ta'kidlashicha, mamlakat so'nggi yillarda iqtisodiy va ijtimoiy islohotlarni jadal amalga oshirmoqda. Uning ma'lumotlariga ko'ra, so'nggi to'rt yilda O'zbekistonda kambag'allik darajasi 23% dan 11% ga tushirilgan. 2025 yilda bu ko'rsatkichni 9% ga, 2030 yilgacha esa yarimgacha qisqartirish rejalashtirilgan.
OTB O'zbekistonning eng yirik rivojlanish hamkorlaridan biri bo'lib, so'nggi besh yilda mamlakat iqtisodiyotini qo'llab-quvvatlash uchun 5,4 milliard dollardan ortiq mablag' ajratgan. Bank O'zbekistonda yashil energetika, xususiy sektorni rivojlantirish va inson kapitaliga investitsiya kiritish sohalarida loyihalarni qo'llab-quvvatlaydi.
