Sobiq Moskva CSKA va O‘zbekiston terma jamoasi futbolchisi Vitaliy Denisov Abbosbek Fayzullaevning Turkiya chempionatidagi klubga o‘tishi mumkinligi haqida fikr bildirdi. Bu haqida Euro-football.ru xabar berdi.
Avvalroq, “Armiya” jamoasi futbolchisiga “Istanbul Boshakshehir” klubi qiziqish bildirgani ma’lum bo‘lgandi. So‘nggi ma’lumotlarga ko‘ra, futbolchi hali tibbiy ko‘rikdan o‘tmagan va bu boradagi xabarlar haqiqatga to‘g‘ri kelmaydi.
Transfer summasi taxminan 7 million yevro bo‘lishi kutilmoqda. Denisovning so‘zlariga ko‘ra, mavsum kutilgan darajada samarali bo‘lmaganiga qaramay, futbolchi ham terma jamoa, ham klub uchun o‘z hissasini qo‘shdi.
CSKA va Abbosbek bu transferdan foyda ko‘radi, chunki u eng kuchli ligaga emas, balki yaxshi darajadagi klubga o‘tmoqda. O‘tgan mavsumda 21 yoshli yarim himoyachi klub darajasida 39 o‘yinda maydonga tushib, 3 ta gol urdi va 8 ta golga uzatma berdi.
