Blan: La Masiya Barselonani qutqardi, yoshlar kelajak

Avval futbolchi bo‘lib faoliyat yuritgan, hozirda Saudiya Arabistonining «Al-Ittihad» klubida murabbiylik qilayotgan Loran Blan «Barselona» akademiyasi haqida o‘z fikrlarini bildirdi. Bu haqida Euro-football.ru xabar berdi.

Uning so‘zlariga ko‘ra, «Barselona» moliyaviy va ma’muriy muammolar tufayli qiyin davrlarni boshidan kechirdi. Biroq, jamoani murakkab vaziyatdan qutqarishga yosh futbolchilar yordam berdi.

Blan uchun «Barselona» doimo ajoyib akademiyaga ega katta klub bo‘lib kelgan. U «La Masiya» akademiyasini klubning yuragi deb ataydi.

Murabbiy ta’kidlashicha, agar «La Masiya» bo‘lmaganda, «Barselona» mavjudligini davom ettira olmas edi, ehtimol klub yo‘qolib ketardi yoki pastroq darajaga tushib qolardi. Aynan yosh futbolchilar jamoani qutqardi.

Jumladan, Jamal, Pedri va Gavi kabi iste’dodlar klubni yana buyuk darajaga olib chiqadi. Loran Blan 1996-1997 yillarda «Barselona» safida o‘ynagan va Ispaniya chempionatida 28 o‘yinda maydonga tushib, bitta gol urgan.

Uning fikricha, yoshlar jamoaning kelajagi va kuchidir.