Angliyaning mashhur futbol klubi “Liverpul” hozirgi vaqtda Luis Diasning o‘rniga munosib futbolchi topish ustida faol ish olib bormoqda. Bu haqida Euro-football.ru xabar berdi.
Ma’lumotlarga ko‘ra, Dias yaqin kunlarda Germaniyaning “Bavariya” jamoasiga o‘tishi kutilmoqda. Shu sababli “Liverpul” klub rahbariyati bir nechta futbolchilar nomzodini ko‘rib chiqmoqda.
Manbalarga ko‘ra, “Liverpul” uch nafar futbolchiga e’tibor qaratgan. Ular Madridning “Real” jamoasidan Rodrigo, “Lion” klubidan Malik Fofana va Germaniyaning “RB Leyptsig” jamoasidan Antonio Nusa.
Ushbu futbolchilar orasida eng maqbul va istiqbolli nomzod sifatida Antonio Nusa ajralib turibdi. Uning transfer narxi hozirda 46,2 million yevroga baholanmoqda.
Antonio Nusa Norvegiyadan bo‘lib, 20 yoshda. O‘tgan mavsumda u klub darajasida 40 o‘yinda maydonga tushib, 8 marta golli uzatma berdi hamda 5 ta gol urdi.
Shuningdek, u o‘zining milliy terma jamoasida ham 15 o‘yin o‘tkazib, 5 ta golga mualliflik qilgan. Shu bois “Liverpul” rahbariyati uni jamoaga olib kelish masalasini jiddiy ko‘rib chiqmoqda.
