Son Xyon Min "Tottenxem"ni tark etishini rasman e’lon qildi
"Tottenxem" hujumchisi Son Xyon Min klub bilan xayrlashmoqda. Bu haqida Euro-football.ru xabar berdi.
33 yoshli futbolchi, jamoa sardori, tez orada klubni tark etishini rasman e’lon qildi. Yangi mavsum rasmiy o‘yinlariga "Tottenxem" o‘zining uzoq yillik yetakchisisiz kirib boradi.
Son Xyon Min matbuot anjumanida "Tottenxem" juda yaxshi klub va uning muxlislari ham ajoyib. Men bu yerda o‘tkazgan vaqtimdan ajoyib xotiralar bilan ketmoqdaman.
Jamoaga yangi mavsumda eng yaxshi tilaklarni bildiraman", deya ta’kidladi. Yaqin dam olish kunlarida "Nyukasl"ga qarshi o‘rtoqlik uchrashuvi Son Xyon Min uchun "Tottenxem" safidagi so‘nggi o‘yini bo‘lishi kutilmoqda.
Agar kutilmagan biror voqea ro‘y bermasa, tez orada janubiy koreyalik futbolchi "Los-Anjeles" klubi bilan shartnoma imzolashi rejalashtirilgan. Shu tariqa, "Tottenxem" o‘zining tajribali va sermahsul hujumchisidan ayriladi, Son esa faoliyatida yangi bosqichni boshlaydi.
Klub rahbariyati va muxlislari unga kelgusi faoliyatida omad tilamoqda.
