Sobiq xorvatiyalik futbolchi Ivan Rakitich “Yuventus” muxlislaridan uzr so‘radi. Bu haqida Euro-football.ru xabar berdi.
Mashhur sobiq yarim himoyachi ijtimoiy tarmoqlarda o‘zining do‘sti Luka Modrich bilan birga tushgan suratini e’lon qilib, uni “Milan” jamoasiga o‘tganligi bilan tabrikladi. Suratga Rakitich muxlislarni ranjitishi mumkin bo‘lgan shiorni ham qo‘shib yozgan edi.
Keyinchalik ushbu matn mazmunidan xabardor bo‘lgan Ivan Rakitich postni o‘zgartirib, rasmiy uzr so‘radi. Ivan Rakitich o‘zining bayonotida quyidagilarni aytdi: “Yuventus” jamoasi muxlislaridan chin dildan uzr so‘ramoqchiman.
Mening maqsadim faqatgina Lukani yangi jamoasi bilan tabriklash edi. Men ushbu so‘zlarning tarixiy ma’nosini va mohiyatini bilmaganman.
Hech qanday holatda klub yoki uning muxlislarini haqorat qilish niyatim bo‘lmagan. “Yuventus” klubiga doimo chuqur hurmat bilan qarayman”.
Ma’lumot uchun, Luka Modrich “Milan” jamoasiga erkin agent sifatida o‘tdi. U Italiyaga ko‘chib o‘tishidan avval 13 yil davomida Madridning “Real” jamoasi safida to‘p surgan.
