Manchester Yunayted Sheshko uchun 85 million yevro taklif qildi

RB Leyptsig jamoasining hujumchisi Benyamin Sheshko atrofidagi transfer jarayoni davom etmoqda. Bu haqida Euro-football.ru xabar berdi.

Avvalroq Angliyaning Nyukasl jamoasi 22 yoshli sloveniya futbolchisi uchun 90 million yevro miqdorida taklif bergan edi. Ushbu summa bonuslarni ham o‘z ichiga oladi.

Endilikda Manchester Yunayted klubi ham Sheshko uchun rasmiy taklif bilan chiqdi. Insayder Fabrizio Romano Bild nashriga asoslanib xabar berishicha, Manchester Yunayted seshanba kuni Benyamin Sheshko uchun 85 million yevro taklif qilgan.

Mazkur taklif ham bonuslarni o‘z ichiga oladi. Bu orqali Manchester Yunayted jamoasi o‘zining ushbu futbolchini qo‘lga kiritish borasidagi qat’iy niyatini namoyon qilmoqda.

Manchester Yunayteddagi manbalarning ta’kidlashicha, Sheshko aynan Old Traffordga ko‘chib o‘tishga ko‘proq qiziqish bildirmoqda. Biroq, sloveniya futbolchisi hali yakuniy qarorini qabul qilgani yo‘q.

Shu sababli, uning qaysi klubni tanlashi hozircha noma’lum bo‘lib turibdi. Transfer bo‘yicha muzokaralar davom etmoqda.