«RB Leyptsig» hujumchisi Benyamin Sheshko «Manchester Yunayted» jamoasiga o‘tishga yaqin turibdi. Bu haqida Euro-football.ru xabar berdi.
Germaniyaning Sky nashri xabariga ko‘ra, ikki klub transfer shartlari bo‘yicha kelishuvga erishgan. Manbaga ko‘ra, muzokaralar davomida tomonlar kelajakda o‘rtoqlik uchrashuvi o‘tkazishga ham rozi bo‘lishgan.
Ushbu o‘yin «Leyptsig» stadionida bo‘lib o‘tadi va mezbon klubga taxminan 1,5 dan 2 million yevrogacha daromad keltirishi kutilmoqda. Shuningdek, Sheshko transferiga oid kelishuvda ko‘zda tutilgan bonus shartlari juda oson bajariladiganligi aytilmoqda.
Shu sababli, «Manchester Yunayted» klubining «RB Leyptsig»ga transfer uchun to‘liq 85 million yevro to‘lashi ehtimoli yuqori. Hozircha transfer bo‘yicha rasmiy bayonot berilmagan, biroq muzokaralar nihoyasiga yetgani va futbolchi tez orada yangi jamoasiga qo‘shilishi kutilmoqda.
Shu tariqa, Benyamin Sheshko «Manchester Yunayted» safini kuchaytirishi mumkin.
