Allegri Yunus Musaning kelajagi borasida qaror qabul qildi
“Milan” jamoasining bosh murabbiyi Massimiliano Allegri yarim himoyachi Yunus Musaning kelajagi borasida o‘z rejasini belgilab oldi. Bu haqida Euro-football.ru xabar berdi.
Amerika fuqarosi bo‘lgan futbolchi o‘tgan mavsumda “rossonerilar”ning asosiy tarkibidan doimiy o‘rin olmagan. Ommaviy axborot vositalarida 22 yoshli futbolchining “Napoli” klubiga o‘tishi mumkinligi haqida xabarlar tarqalmoqda.
Bundan tashqari, Angliyaning “Nottingem Forest” jamoasi ham unga qiziqish bildirgan. Shunga qaramay, Allegri Musani jamoada saqlab qolishni istaydi, deya ma’lum qilmoqda jurnalist Matteo Moretto.
Shu bilan birga, manbaga ko‘ra, “Milan” rahbariyati futbolchini sotish masalasini ham ko‘rib chiqishi mumkin. Agar xaridorlar 25 million yevrodan ko‘proq mablag‘ taklif qilsa, klub Musani sotish haqida o‘ylashi ehtimol.
Transfermarkt portali ma’lumotiga ko‘ra, Yunus Musaning narxi hozirda 20 million yevroga teng. Uning amaldagi shartnomasi 2028 yilgacha mo‘ljallangan.
