Inyigo Martines "Barselona" bilan samimiy xayrlashdi
Markaziy himoyachi Inyigo Martines “Barselona” klubi bilan xayrlashdi. Bu haqida Euro-football.ru xabar berdi.
Shanba kuni futbolchi Kataloniya jamoasini tark etdi va oradan ko‘p o‘tmay uning Saudiya Arabistonining “Al-Nasr” klubiga o‘tganligi ma’lum bo‘ldi. Inyigo Martines o‘zining xayrlashuv murojaatida “Hayotimda iz qoldirgan klub bilan xayrlashmoqdaman.
Bu emblemani himoya qilish men uchun katta sharaf va mas’uliyat bo‘ldi. Har kuni muhabbat va sadoqat bilan harakat qildim.
Bu yerda ilk kundan oxirigacha orzuga yashadim. Klub libosini kiyish katta baxtdir”, deya ta’kidladi.
U, shuningdek, murabbiylar, butun texnik xodimlar va jamoadoshlariga minnatdorlik bildirdi. Ularni o‘zining oilasi deb atadi.
Futbolchi muxlislarga ham o‘z minnatdorligini bildirib, ularning kuchli qo‘llab-quvvatlashi uchun rahmat aytdi. Barselona shahri esa uning va oilasining yuragida abadiy qolishini qayd etdi.
Martines so‘zida maydonda va undan tashqarida o‘z vazifasini munosib bajarganiga umid bildirdi. “Barselona” har doim uning hayotining bir qismi bo‘lib qolishini ta’kidladi.
Eslatib o‘tamiz, Inyigo Martines 2023 yil yozidan beri “Barselona” safida to‘p surgan.
