Madridning “Real” jamoasida to‘p surayotgan mashhur hujumchi Vinisius Junior faoliyatini Angliya Premer-ligasining yetakchi klublaridan birida davom ettirishi mumkin. Bu haqida Euro-football.ru xabar berdi.
“Manchester Siti” klubi rahbariyati braziliyalik futbolchini o‘z safiga qo‘shib olishga qiziqish bildirmoqda. Ma’lumotlarga ko‘ra, “Manchester Siti” 25 yoshli hujumchini joriy transfer oynasi yopilguniga qadar sotib olishga harakat qilishi mumkin.
Vinisius Juniorning bozor bahosi hozirda 170 million yevroga teng deb baholanmoqda. Vinisius Junior 2018 yilning yozidan beri “Real Madrid” jamoasida o‘ynab kelmoqda.
Uning “Real” klubi bilan tuzgan shartnomasi 2027 yilning iyun oyida yakunlanadi. Shu vaqtgacha futbolchi Madrid jamoasi sharafini himoya qiladi.
Eslatib o‘tamiz, Vinisius Junior “Real” tarkibida bir nechta sovrinlarni qo‘lga kiritgan va jamoaning asosiy hujumchilaridan biri hisoblanadi. Uning kelajagi borasidagi yangiliklar futbol ishqibozlari orasida katta qiziqish uyg‘otmoqda.
