Madridning "Real" jamoasi markaziy himoyachisi Eder Militao uzoq tanaffusdan so‘ng ilk bor asosiy tarkibda maydonga tushdi. Bu haqida Euro-football.ru xabar berdi.
Braziliyalik futbolchi jamoasiga Avstriyaning "Tirol" klubiga qarshi o‘rtoqlik uchrashuvida 4:0 hisobida g‘alaba qozonishda yordam berdi. Uchrashuvning 11-daqiqasida 27 yoshli himoyachi hisobni ochdi.
62-daqiqada esa u Antoni Ruediger bilan almashtirildi. Eder Militao o‘z intervyusida maydonga qaytganidan juda xursand ekanini ta’kidladi.
Uning so‘zlariga ko‘ra, maydonga qaytishi uchun ancha vaqt talab qilindi, biroq endi u yana jamoasiga yordam bera oladi. Futbolchi, shuningdek, har safar murabbiy unga ishonch bildirsa, bor kuchi bilan harakat qilishini aytdi.
U o‘zining urgan goli haqida ham fikr bildirib, zarba yaxshi chiqqanini, biroq to‘p darvozaga kirishini kutmaganini qayd etdi. Eslatib o‘tamiz, Eder Militao noyabrdan iyulgacha tizzasidagi jiddiy jarohat tufayli maydonga tusha olmagan edi.
U tizza payining uzilishi sababli uzoq vaqt davolandi. Futbolchining qaytishi Klublar o‘rtasidagi jahon chempionati doirasida "PSJ"ga qarshi o‘yinda sodir bo‘ldi.
O‘sha uchrashuvda u ikkinchi bo‘limda zaxiradan maydonga tushirilgan edi.
