"Pari Sen-Jermen" futbol klubi bosh murabbiyi Luis Enrike jamoa darvozaboni Janluiji Donnarumma bilan bog‘liq vaziyatga izoh berdi. Bu haqida Euro-football.ru xabar berdi.
Unga ko‘ra, Donnarumma Yevropa Superkubogi bahsida "Tottenhem"ga qarshi o‘yinda ishtirok etadigan futbolchilar ro‘yxatiga kiritilmadi. Murabbiy Enrike o‘z fikrida Donnarummani dunyoning eng kuchli darvozabonlaridan biri sifatida e’tirof etdi.
Shuningdek, u inson sifatida ham katta hurmatga loyiq ekanini ta’kidladi. Enrikening so‘zlariga ko‘ra, yuqori darajadagi futbolda bunday qarorlar qabul qilinishi tabiiy holat hisoblanadi.
U bu murakkab tanlov uchun to‘liq javobgarlikni o‘z zimmasiga oldi. Enrikening aytishicha, bu qaror jamoaga aynan hozirda qanday darvozabon kerakligi bilan bog‘liq.
Italiya terma jamoasi darvozaboni Donnarumma 26 yoshda. U "Pari Sen-Jermen" safini yozgi transfer oynasida tark etishi yoki 2026 yilda erkin agent sifatida klubdan ketishi mumkin.
Shu bilan birga, murabbiy futbolchining jamoadagi kelajagi borasida yakuniy qaror hali qabul qilinmaganini ham qo‘shimcha qildi. Enrike Donnarummaga o‘z minnatdorchiligini bildirib, unga kelajak faoliyatida omad tiladi.
