Milan sport direktori Hoylunn transferi uchun Angliyaga bordi
Manchester Yunayted hujumchisi Rasmus Hoylunn hozirda Milan jamoasining asosiy transfer maqsadlaridan biri bo‘lib qolmoqda. Bu haqida Euro-football.ru xabar berdi.
Manchester Yunayted klubi futbolchidan voz kechmoqchi, chunki u asosiy tarkibda muntazam maydonga tushishi qiyin bo‘lishi mumkin. Biroq, daniyalik hujumchi jamoani tark etishni istamayapti.
U o‘zini hamon jamoaga foyda keltira oladigan futbolchi deb hisoblaydi, hatto Benyamin Sheshko kelganidan keyin ham o‘z imkoniyatiga ishonmoqda. Italiya matbuotining xabar berishicha, Milan sport direktori Igli Tare Angliyaga tashrif buyurib, Rasmus Hoylunni Manchester Yunaytedni tark etib, Milan safini to‘ldirishga ko‘ndirishga harakat qilmoqda.
Milan klubi 22 yoshli hujumchini ijaraga olib, keyinchalik to‘liq sotib olish imkoniyatini ham ko‘rib chiqmoqda. Muzokaralar ushbu hafta davomida davom etishi kutilmoqda.
Agar tomonlar kelishuvga erisha olmasa, Milan boshqa nomzodlarga e’tibor qaratishi mumkin. Shu tariqa, transfer bo‘yicha yakuniy qaror yaqin kunlarda ma’lum bo‘lishi kutilmoqda.
