Rasmus Hoylund Milanga ijaraga o‘tishi mumkin

Manchester Yunayted hujumchisi Rasmus Hoylund klubning kelajakdagi rejalariga kiritilmagan. Bu haqida Euro-football.ru xabar berdi.

Yaqinda jamoaga yangi futbolchi Benyamin Sheshko qo‘shildi va u asosiy tarkibda o‘ynashi kutilmoqda. Muxbir Nikolo Skira xabariga ko‘ra, Manchester Yunayted rahbariyati Hoylundga klub unga ishonch bildirmasligini bildirgan.

Shu sababli, daniyalik futbolchi jamoani tark etish haqida o‘ylamoqda. Ayni paytda Italiyaning Milan klubi 22 yoshli futbolchini ijaraga olish bo‘yicha muzokaralar olib bormoqda.

Milan Hoylund uchun 5 million yevro miqdorida ijaraga olish taklifini bildirgan va keyinchalik 40-45 million yevroga sotib olish huquqini ham ko‘zda tutmoqda. Manbalarga ko‘ra, Milan klubi futbolchi uchun 2030 yilgacha mo‘ljallangan shartnoma va yillik 5 million yevro maosh tayyorlagan.

Rasmus Hoylund ikki yil davomida Manchester Yunayted safida to‘p surdi. U klub uchun 95 o‘yinda maydonga tushib, 26 ta gol va 6 ta samarali uzatma muallifi bo‘ldi.

Hozirda uning kelajagi borasida muzokaralar davom etmoqda.