“Bavariya” hujumchisi Harri Keyn Yevropa Chempionlar Ligasi tarixida yana bir muhim rekordni o‘z nomiga yozdirdi. U turli raqib jamoalarga qarshi eng ko‘p gol urgan ingliz futbolchisiga aylandi.
Yaqinda “Inter”ga qarshi bo‘lib o‘tgan safar o‘yinida Keyn jamoasining ikkinchi goliga mualliflik qildi va shu tariqa turnir doirasida 21 xil jamoa darvozasiga gol urgan ilk ingliz futbolchisi bo‘ldi.
Avvalgi rekord “Manchester Yunayted” afsonasi Pol Skoulzga tegishli edi — u faoliyati davomida 20 jamoaga qarshi gol urgan.
Bu gol Keyning joriy mavsumdagi 35-goli bo‘ldi. Aytish joizki, u 2023 yildan beri Yevropaning beshlik chempionatlarida barcha musobaqalarda 79 ta gol urdi va 101 ta golli harakatda ishtirok etgan — bu ko‘rsatkich hozircha hech bir futbolchida yo‘q.
Harri Keyn hozirda nafaqat “Bavariya”, balki Yevropadagi eng faol, samarali va ta’sirli hujumchilardan biri sifatida e’tirof etilmoqda.
