O‘zbekiston milliy terma jamoasi sardori, Italiyaning “Roma” klubi hujumchisi Eldor Shomurodov A Seriyadagi yuqori saviyadagi o‘yinlari bilan nafaqat o‘z jamoasi, balki butun chempionatning diqqat markaziga aylanmoqda.
Yevropa Chempionlar ligasi yo‘llanmasi uchun qiziqayotgan “Roma” so‘nggi turlarda muhim ochkolar to‘plab kelmoqda va bu jarayonda Eldorning hissasi beqiyos. O‘zbekistonlik legioner jamoaning oxirgi beshta uchrashuvidan to‘rttasida hal qiluvchi harakatlar bilan ishtirok etib, 2 ta gol va 2 ta golli pas muallifiga aylandi.
Muxlislar tan oladi: Eldor — oy futbolchisi
Yaqinda o‘tkazilgan so‘rovnomada “Roma” ishqibozlari aprel oyining eng yaxshi futbolchisi sifatida Shomurodovni tanlashdi. Uning raqobatchilari — darvozabon Mile Svilar va hujumchi Matias Sule sezilarli farq bilan ortda qolishdi. Bu Eldorning mavsumdagi ikkinchi shaxsiy e’tirofi — fevral oyida ham u oyning eng yaxshi o‘yinchisi sifatida tan olingan edi.
Whoscored'dan ramziy e’tirof
Futbol statistikasining yetakchi platformalaridan biri Whoscored.com A Seriyaning 35-turi uchun tuzilgan ramziy terma jamoani e’lon qildi. Hujum chizig‘ida Eldor Shomurodov o‘z o‘rnini topgan. Uning yonida “Atalanta” hujumchisi Mateo Retegi joy olgan.
35-turda “Roma” o‘z maydonida kuchli raqib “Fiorentina”ni mag‘lub etdi. Uchrashuvdagi yagona golga ukrainalik forvard Artyom Dovbik mualliflik qilgan bo‘lsa-da, bu imkoniyatni aynan Shomurodov yaratgan. Eldor qiyin vaziyatda bo‘lishiga qaramay, to‘pni boshi bilan aniq yo‘naltirib Dovbikka uzatdi va u gol kiritdi.
Italiyadagi faoliyati: raqamlar va natijalar
Shomurodovning Italiya klublaridagi faoliyati bosqichma-bosqich o‘sib bormoqda. Quyida uning statistikasi:
- Jenoa: 32 o‘yin – 8 gol, 2 assist
- Spetsiya: 16 o‘yin – 1 gol, 2 assist
- Kalyari: 24 o‘yin – 3 gol, 3 assist
- Roma: 82 o‘yin – 13 gol, 11 assist
Shomurodov ayni paytda “Roma”dagi eng samarali mavsumini o‘tkazmoqda. Uning ishtiyoqi, harakatchanligi va taktik intellektu Rim jamoasida o‘zining alohida o‘rniga ega ekanini isbotlamoqda.
Shartnoma 2027 yilgacha uzaytirildi
“Roma” rahbariyati Eldorga ishonch bildirib, u bilan tuzilgan shartnomani 2027 yil 30 iyungacha uzaytirdi. Bu qaror klubning unga bo‘lgan ishonchini yanada mustahkamlaydi.
Shomurodov nafaqat o‘zbek futboli uchun faxr, balki Yevropa sahnasini zabt etayotgan haqiqiy yulduzga aylanmoqda. “Roma” safidagi har bir qadami uni yuqori pog‘onalarga olib chiqmoqda.
