Luka Modrich "Real"dan ketishga yaqinmi? Futbolchiga yangi shartnoma taklif qilinmadi
Madridning "Real" klubi bilan 12 mavsumdan ortiq vaqt davomida shon-sharaflarga to‘la tarix yozgan xorvat yulduzi Luka Modrichning kelajagi katta savol ostida qolmoqda. COPE radiosi orqali tarqatilgan ma’lumotlarga ko‘ra, madridliklar hozircha 39 yoshli yarim himoyachiga yangi shartnoma taklif qilmagan.
Jurnalist Migel Anxel Diasning ta’kidlashicha, “Santyago Bernabeu”da 24 may kuni “Real Sosedad”ga qarshi o‘tadigan La Liganing so‘nggi tur bahsi Modrich uchun xayrlashuv kechasiga aylanishi mumkin. Ayrim manbalar ushbu uchrashuvda muxlislar bilan samimiy vidolashuv kutilayotganini bildirmoqda.
Shu bilan birga, "Real"ni yangi mavsumdan boshqarishi mumkin bo‘lgan Xabi Alonso Modrichning taqdiriga doir qaror qabul qilishda ishtirok etmagani qayd etilmoqda. Demak, klubning qarori butunlay rahbariyat doirasida qabul qilingan bo‘lishi ehtimoldan xoli emas.
Modrich joriy mavsumda ham jamoa uchun muhim figura bo‘lib qoldi. U 55 ta uchrashuvda maydonga tushib, 4 ta gol va 9 ta assist bilan o‘z hissasini qo‘shdi. Har qancha yoshga kirgan bo‘lsa-da, Lukaning tajribasi va maydondagi qaram-quruvsiz harakatlari uni "Real" uchun bebaho aktivga aylantiradi.
Agar madrid klubi fikridan qaytmasa va yaqin kunlarda yangi bitim taklif etilmasa, futbol olami yana bir afsonaning boshqa sahifaga o‘tishiga guvoh bo‘ladi.
Zamin.uz tahririyati Modrichning “Real”dagi ehtimoliy oxirgi kunlarini diqqat bilan kuzatib boradi. Siz uning ketishi haqida qanday fikrdasiz? U hali jamoaga kerakmi?
