Anchelotti Braziliyaga qanday o‘tgan? FIFA rasmiy surishtiruv boshladi!
Futbol olamida katta shov-shuvlarga sabab bo‘lgan navbatdagi voqelik: Italiyalik mashhur mutaxassis Karlo Anchelottining Braziliya terma jamoasiga tayinlanishi FIFA tomonidan rasmiy tekshiruv ostiga olindi. Braziliya futbol konfederatsiyasi (CBF) mazkur tekshiruv haqida FIFAdan rasmiy xat olganini tasdiqladi.
FIFA tekshiruvining asosiy sababi — Anchelottining Braziliyaga o‘tishi jarayonida agentlik faoliyatiga oid xalqaro qoidalar buzilgan bo‘lishi mumkinligi bilan bog‘liq. Xususan, Anchelottining vakili Diyego Fernandes agentlik litsenziyasiga ega bo‘lmagan holda 1,2 million yevro miqdorida komissiya olishni ko‘zda tutgan.
FIFA tomonidan yuborilgan xatda shunday deyiladi:
“Janob Diyego Fernandes hozirda agent sifatida ro‘yxatdan o‘tmagan, biroq u Karlo Anchelottini “Real”dan Braziliya terma jamoasiga o‘tish jarayonida faol ishtirok etgan va agentlik xizmatlarini amalga oshirgan.”
Bu holat FIFAning 2023 yildan kuchga kirgan yangi agentlar nizomlariga zid hisoblanadi. Unga ko‘ra, agentlik xizmatlarini faqatgina rasmiy litsenziyaga ega shaxslar amalga oshirishi mumkin.
FIFA Braziliya futbol konfederatsiyasidan quyidagilarni taqdim etishni talab qilgan:
• Diyego Fernandes ishtirok etgan barcha muzokaralar va uchrashuvlar haqidagi ma’lumotlar.
• Fernandesning imzosi tushgan har qanday shartnomalar.
• To‘langan mablag‘lar haqida moliyaviy hisobotlar.
• CBFning ushbu masala bo‘yicha rasmiy izohi.
CBF tomonidan berilgan javobda esa tekshiruvga doir quyidagi ma’lumotlar berilgan:
“Karlo Anchelottini Braziliya terma jamoasiga jalb qilish muzokaralari tashkilotning oldingi rahbariyati davrida o‘tkazilgan. Barcha kelishuvlar maxfiy shartnomalar asosida amalga oshirilgan. Hozirgi ma’muriyat bu masalani ichki ravishda o‘rganmoqda.”
Bu orada Anchelottining vakili Diyego Fernandes ham masalaga munosabat bildirib o‘tdi. Uning ta’kidlashicha, u o‘zini agent sifatida emas, maslahatchi sifatida ish olib borgan:
“Muzokaralar juda qisqa muddatda o‘tkazilgani tufayli men FIFA ro‘yxatiga agent sifatida kirishga ulgurmadim. Yaqin kunlarda rasmiy agent sifatida ro‘yxatdan o‘taman va shundan so‘ng xizmatlarim uchun haq olishga umid qilaman.”
Ushbu voqea futbol olamida katta muhokamalarga sabab bo‘lmoqda. Bu voqelik nafaqat Braziliya terma jamoasi bilan bog‘liq tayinlovlarga, balki butun futbol agentligi tizimiga oid masalalarni qayta ko‘rib chiqish zarurligini ko‘rsatmoqda.
Zamin.uz tahririyati bu masala bo‘yicha barcha rivojlarni kuzatib borib, sizni dolzarb ma’lumotlar bilan xabardor qilib boradi. Anchelotti kabi murabbiy atrofidagi shov-shuvlar hali uzoq vaqt futbol muhitidan ketmaydi, shekilli.
